Suna toh hai ki jab sar pe exams ka bhoot aa jaaye toh mandir se acchi jagah aur kuch nahi hoti hai . Bhagwan sabse acche tabhi lagte hai jab humpar exams taandav karte hai . Hum har din kitna bhi mauj kar le magar jab exams paas aate hai toh sabki watt lag jaati hai .Class me jab aliens banke baithte hai tab yeh khayaal nahi aata hai ki exam me kya likhenge aur jab exam aa jaate hai tab sochte hai ki kash class me dhyaan diye hote. Humaare bhi internals ek hafte baad shuru honge , sab ke sab pareshaan hai aur bechain hai . Lekin college ke ek ore kuch aise bhi log hai jo shuru hone se pehle kuch majaa karna chahte hai . Sanchit aur Aarav ka plan hai ki exam shuru hone se pehle hum ek chote se forest camping pe jaaye. Abhi dono gaye hai orkut ke paas , baahar jaane ki permission lene . Waise humne bhi haan isiliye kahi hai kyuki hume pata hai orkut kisi bhi haal me permission nahi denge . Exam se pehle outing kabhi nahi . Cricket ke history me bhi aisa nahi huwa hoga ki world cup se pehle ipl .
" Haan toh players ! tum log ek trip pe jaana chahte ho ? Am I right ? "
Jawaab dene me hamesha ki tarah Aarav aage - " Haan sir ! hum aur humaare kuch dost mandir jaana chahte hai ."
" Mandir ? " Sun ke toh orkut bhi hairaan ho gaye .
" Haan sir ! exams ke pehle hum bhagwan ke darshan karna chahte hai isiliye ."
Sanchit waise toh bahut bolta rehta hai par orkut ke saamne uski hawa nikal jaati hai . Saara daarom-daar Aarav ke upar hai ab .
" Par mandir toh tumhare hostel me bhi hai , waha hi bhent kar lo ."
" Sir hum jaante hai par jahaa hum jaana chahte hai woh bahut jaagta huwa mandir hai ."
" You mean jaagruk ?"
" Haan sir ! same to same ."
Sanchit ko dekhte hi dekhte pasine aane lage . Aarav bhi dara huwa hai par sab usse hi sambhaalna hai .
Aas-paas ki cheeje dekh ke toh waise hi kisi horror film ka feel aata hai orkut ke office me , yaa phir bole ki orkut ke dressing room me .
Deewar pe saari dark shades me sachin ki badi-badi tasveerein . Jahaa jagah bach gayi waha pe dark pink colour aur unke upar orkut ki tasveerein , jo sabse jyada bhayanak hai . Unki har tasveer me alag - alag chehre ke bhaav . Saare bhaav aise jinhe dekhke toh koi bade se bada bhoot bhi pishaab karde. Unke office me aake lagta hai jaise kisi stadium ke dug-out me aa gaye hai . Bas kami hai Indian Cricket Team ke Players ki . Sachin orkut ke favourite player hai aur unke liye unke pehle baap.
" I get you now . Jaise sachin apne match se pehle Sai baba ke darshan karta hai waise tum log bhi mandir jaake apne exam se pehle bhagwan ke darshan karna chahte ho . "
Ab dono thoda relax ho gaye . Aarav bola - " Haan sir ! same to same ."
" Ok ! tumhare paas ek din hai . Jao jaake aashirvaad lelo . Waise bhi padhai karke toh number aate nahi , ab shayad bhagwan ke aashirvaad se thode number mill jaaye . "
" Thank you sir ! Thank you ! "
Phir dono hi openers apni innings khel ke waapis aa gaye . Khushi hai unhe kyuki dono ne 100 run ki partnership jo kar li ab .
No comments:
Post a Comment