Aarav aur main bike pe baithke hostel waapis jaa rahe hai aur bike chala raha hai aarav . Mere peeth pe mera bag hai jo mere liye bilkul bhi bojh nahi hai . Bojh toh yeh hai ki ab main ghar pe sabko kya bataau ? Piche baithke dimaag me yehi chal raha hai ki kya kahuun ghar waalo ko ? Kaun sa bahaana banaau ki kyu nahi aaya ? Mann me kya nahi chal raha hai iss waqt . Kya bolu ?
Mummy ! woh chuttiyon me ek assignment mill gaya isiliye nahi aa paaunga .
Naah ! yeh pakda jaayega . Mummy kahegi ki assignment wahi aaker karlo . Jaana toh iss case me bhi padega .
Mummy ! last minute me chuttiyaan cancel ho gayi isiliye nahi aa paaunga .
Naah ! agar papa ne shaq kiya aur shaq ko dur karne ke liye unhone college me pata kar liya toh main toh gaya . Jaana toh rehne do , main kaam se hi chala jaaunga .
Mummy ! meri tabiyat kharaab ho gayi isiliye safar nahi kar paaunga dehradun se gorakhpur tak .
Naah ! agar aisa kaha toh mummy aur papa dono yehi aa jaayenge . Aise me main nahi gaya toh kya ? Woh toh idhar aa jaayenge .
" Mummy se keh de ki teri gaadi last moment pe chhoot gayi aur tune train miss kar di . Aage 5 din tak waise bhi koi train nahi mill payegi tujhe . " Main bas jhooth ke raste dekh hi raha tha ki aarav ne gaddho ka maap bhi bata diya . Isko kehte hai kaam me aaya dost ka jigar . Aarav ne jo kaha woh mujhe bhaa gaya . Ab yehi kahunga ghar pe sabhi ko lekin bolne ke liye chayiye apna dur - sanchar kendra , matlab PCO .
Haan yaar ! tu bilkul sahi bola . But aage jo pco dikhe to rok lena .
Hostel ke raaste me hi ek choti si dukaan padti hai aur waha se call kar sakte hai hum toh bike wahi roki aur maine aarav se coin lekar ghar number ghumaya . Phone ki ghanti baji aur mummy ne call uthaya -
" Hello ! "
Hello mummy ! vishu bol rahe hai .
" Vishu ! yeh kaha ka number hai ? Kisi dost ka mobile hai kya ? " Pehla sawaal hi seedhe mudde pe ki kaha se milaa rahe ho . Pata nahi ek hi pal me sab kuch kaise dekh leti hai mummy ? Mujhe laga ki pehla sawaal unka yeh hoga ki train me baitha ki nahi par main galat nikla .
Nahi ! kisi ka number nahi hai yeh . Main pco se bol raha hun iss waqt .
" PCO se kyu ? Gaadi late hai kya ? " Ab sahi samay pe sahi sawaal kiya na mummy ne . Ab kaam ki baat bata dun zara .
Woh late nahi balki main late ho gaya . Meri train chhoot gayi hai .
Thodi dheemi aur sehmi huwi aawaaz me bola kyuki mujhe zara sa bhi andaaza nahi hai ki mummy kaise react karengi yeh sunke - " Kaise late ho gaye tum ? Ab papa ka gussa toh tum hi jhelo , hum kuch nahi jaante . " Issi ke baad papa ne mummy se phone le liya aur woh bhi shuru ho gaye .
Shuru kya , mujhpe barasne lage - " Kitne laaparwaah nikloge tum haan ? Aise kaise tumhari train chhoot sakti hai haan ? Koi samay ka lihaaj hai bhi ki waha jaaker sab kuch bhool gaye ho tum ? Ab kuch bolte kyun nahi ? Zubaan bhi chali gayi hai kya tumhari ? "
Main kyun nahi bol raha iska andaaza iss baat se lagaaya jaa sakta hai ki woh mujhe bolne ka mauka hi kaha de rahe hai . Main papa ko kya jawaab dun . Meri toh bolti hi bandh ho gayi hai ekdum se . Darr ke maare receiver hi haath se gir gaya aur phone cut gaya . Phone cut jaane se woh samjhenge ki maine jaan - bujh ke phone kaat diya aur phir mujhe aur bhi kayi jyada sunna padega .
" Aap itna gussa kar diye toh woh bhi gusse me phone kaat diya hoga . Aap bhi na ? Apne gusse ke aage kisi ko kuch bhi bol dete ho . Ek toh woh itne mushkil se aane ko taiyyaar huwa tha , ab toh woh aur bhi nahi aayega . " Mummy aur papa waha aapas me jhagadhne lage . Mummy ne aansuon ki lehrein bahaani shuru kar di . Papa toh gusse se tar hai - " Itna gussa zaayaj hai . Train chhooti nahi hogi . Woh jaan ke train chodha hoga . Na aane ka bahaana chayiye bas . Hum toh pehle hi bole the ki khud jaake usko le aaye lekin nahi , woh chala aayega apne - aap . Aa gaya na tumhara beta ? Ab baithke roo yaha . " Itna bada toofaan koi tabaahi machaata usse pehle maine doobaara coin daala aur phone laga diya .
" Hello ! suno train ke bajaay hum bus se aa jaaye kya ? "
Mujhe nahi pata ki line ki doosri taraf kaun hai . Maine seedhe phone laga ke keh diya . Na kuch socha aur na kuch samjha bas jo mann me aaya woh keh diya . Ab agar mujhe jaana hi hai toh main train se hi chala jaata . Bina kisi wajah ke train ko kyun chodh diya . Mere toh kuch samajh nahi aa raha hai abhi .
" Hello ! bus se ? Haan ! yeh kaam kar sakte ho tum . Par abhi koi bus milegi waha ki nahi ? " Papa hi hai phone pe aur papa toh turant maan bhi gaye . Mujhe laga tha ki woh mujhe bus se aane ko mana karenge aur kahenge ki rehne de iss baar . Agli chutti me aa jaana par woh toh seedhe haan kar diye . Main toh bura phans gaya ab . Ab toh jo bola hai woh karna bhi padega .
Dekhte hai . Raat me kayi buses nikalti hai yahaan se . Kisi ek me baithke aa jaate hai . Theek na ?
Udhar mere phir se aane ka sunke mummy papa se phone chheen leti hai - " Raat me nikloge toh akele mat aana . Akele sahi nahi hoga aadhi raat me kyuki aate - aate subah ho sakti hai . Matlab poori raat safar karoge aur woh bhi akele ? Nahi beta ! Apne dost ke saath hi aao tum . "
Waise mummy ki kuch hi baat mujhe sahi lagti hai par iss baar jab mummy ne ek upaay diya toh mere bhi dimaag ki batti jali . Mummy ko dost chayiye ? Iska matlab main ghar aau par kisi dost ke saath ? Main ghar kis kaaran nahi jaana chahta ? Yaha ruk kar mujhe nishita ko protect karna hi hai ? Agar mummy ko mere saath koi dost bhi chayiye toh woh dost nishita bhi toh ho sakti hai ? Mere dono kaam ek saath nibat jaayenge isse toh . Toh ab yehi sahi . Par agar nishita ne mana kar diya chalne ko toh ? Nahi ! woh mujhe mana nahi kar paayegi , main jaanta hun . Kabhi - kabhi mera dimaag bhi 3G jaise chalne lagta hai .
Mummy ! haan ek dost hai jo mere saath aa raha hai ghar ?
Maine thoda rukke aur hich - kichate huwe mummy ko bola . Mujhe nahi pata ki mummy jab sunengi ki main ghar ek ladki ko laa raha hun toh woh kya kahengi .
" Kaun , wahi na jo tumhara room - mate hai ? Kya naam bataya tha uska ? " Mummy ko lag raha hai ki mere saath aarav aa raha hai . Mujhe unki yeh galat - fehmi dur karni hogi warna na jaane kya hoga . Par main kaise bolu ki main ek ladki ke saath poori raat bus se safar karke waha aa raha hun ? Bhai ! jab itna kuch kar diya toh thodi si himmat aur jutaa le aur bol de sab kuch .
Nahi aarav nahi ! koi aur hai ?
Itna kuch bolna hai par bolte samay zubaan ladh - khadhaa rahi hai meri . Itna tension toh mujhe tab bhi nahi huwa tha jab maine apne chhat se chhalaang lagaayi thi .
" Aur kaun beta ? " Udhar mummy bhi soch rahi hongi ki main itni paheli kyu bujh raha hun .
Uss dost ka naam hai Nishita .
Bas poori line dheere bola par jab nishita ka naam aaya toh rajdhaani ki gati se bola . Taaki naam se jyada kaheen aur dhyaan de par mummy aur papa dono ne naam poora saaf - saaf sun liya .
" Nishita kaun hai ? Yeh toh ladki lagti hai ? Tumhare saath aa rahi hai ? " Bas naam sunte hi sawaal ki jhadhi lag gayi . Issi baat ka darr tha ki mummy koi sawaal na kare par aisa ho sakta hai ki samundar me lehrein na uthe .
Ladki lagti nahi , ladki hi hai . Woh mere hi college me padhti hai aur mummy anaath hai bechaari . Uska koi nahi hai iss duniya me . Maine socha ki chutti me apne saath ghar le aau aur tum log ke saath thode din bitaayegi toh usko bhi ek family ka pyaar mill jayega . Sahi kiya na maine ?
" Chal ! ab humse filmy baatein mat kar . Sach keh raha hai ki udaa raha hai ? " Phone pe papa aa gaye aur mujhe pata bhi nahi chala . Socha tha ki mummy pe thoda senti line maarunga toh woh pighal jaayengi par papa toh sakht hai patthar jaise .
Filmy nahi papa . Sach me woh mere saath hi aa rahi hai . Tum log khud hi mil lena na ?
Iske baad main unke jawaab ke liye intezaar karne laga . Mummy aur papa phir se aapas me baatein karne lage - " Dekho ! ab chaahe koi bhi ho , aa raha hai na . Bas itna kaafi hai . Aayega toh dekh lena aap . Bas usko ek baar aa toh jaane do ! " Mujhe poori baatein toh nahi sunaai de rahi par jitna sunaa utna kaafi hai . Mummy ne samjhaaya papa ko shayad aur kya khoob samjhaya ki papa maan bhi gaye .
" Theek hai beta ji ! aa jaao . Aur suno dhyaan se aana . Khyaal rakhna uska raaste me aur apna bhi . " Ohh ! itna sunke dill ko santooshti mili . Aakhir sab kuch nipat gaya saste me .
Theek hai ! ab rakhta hun phone . Byee !
Baahar aarav saari baatein sun raha tha . Hum bike pe baithke waapis hostel ke liye nikal liye . Par aarav ko kuch samajh nahi aaya ki maine kya bola phone karke - " Yaar ! mujhe kuch palle nahi pad raha ? I m totally confused man ! "
Kyu kya huwa ? Jaldi chal hostel , nishita ko lena hai .
Meri baatein na toh arbi me hai aur na hi faarsi me par phir bhi aarav ke sar ke upar se nikal gayi - " Pehle toh tune train chodhi . Theek na ? Chodhi kyu , kyuki tujhe ghar nahi jaana . Theek na ? Phone kiya ghar pe . Kiya kyu , kyuki mummy ko bata sake ki train chhoot gayi . Theek na ? Phir unko kehta hai ki tu bus se aa raha hai aur woh bhi nishita ke saath . Theek na ? Par phir tu kyun jaa raha hai aur woh bhi nishita ko lekar ? What sort of man are you haan ? "
Mujhe pata tha ki aarav aisa hi kuch puchega . Maine socha ki agar isko sab bataane baitha toh subah ho jaayegi isiliye chup rehne me hi bhalaai hai .
Yaar ! ab tum itna mat socho . Sab bata dunga pehle ek baar apne ghar pahunch jaau . Phir waha se tujhe phone pe sab clear kar dunga . Bas abhi tu jaldi hostel chal .
Iske baad aarav ne kuch nahi pucha kyuki usko itna sochne ki aadat jo nahi hai .
Waise ek baat bolun aarav ! Duniya me insaan chaahe kuch bhi ban jaaye , emotional atyachaar jab hota hai na tab bhagwan bhi na - samajh lagne lagta hai .
Aarav yeh sunke toh aur bhi ghum gaya - " Ae ! chup re . Ek toh pehle se tune dimag ki maa - behen ki huwi hai , upar se yeh double meaning dialogue bolke meri watt na laga ab . "
Bechara aarav ! bhale hi woh kuch na samajh raha ho par jo maine kaha woh main poori tarah se samajh raha hun . Aisa bhi hoga , maine nahi socha tha .
