" Haan toh kaun batayega ki kal kaun sa topic start huwa tha class me ? " College ki pehli class subah - subah hi lagi thi jisse jyadatar ladko ka dhyaan raat ki neend me hi tha . Par bhai padhaai toh padhaai hai , karni toh padegi . Aur koi aur padhe na padhe , sir ka favourite student Vishnu toh padhega hi . Sawaal poori class se puche magar jawaab chayiye Vishnu se .
" Vishnu ! tumhi batado ki kal humne kya kiya tha ? " Sir apna chashma apni naak ke niche khaskhaate huwe bole . Unki yeh aadat thi ki jab bhi woh sawaal ke jawaab ka intezaar karte , apne chashme ko apne chehre pe hilaate rehte . Baal hilaane ki toh umar hi guzar chuki thi unki . Waise bhi safed baal kitni roshini denge . Sir vishnu ko khada karte hai taaki woh unhe bata sake ki kal class me kya padhaaya gaya tha . Vishnu aaj last bench par baitha tha . Roz toh aage baitha karta tha phir aaj last kyu ? Woh isiliye kyuki aaj woh class me late se aaya tha .
Vishnu dheere - dheere khada hoker bade hi vishwaas ke saath jawaab deta hai - " Woh hara waala dupatta kharidlo aap . Aap par jyada accha lagega . " Vishnu ko nahi pata tha ki woh kya bak raha hai . Khoye huwe khyaalon me , neend me soye huwe woh class me baitha toh tha par soch raha tha seeta ke baare me . Bolta toh usme seeta ka zikr nikalta . Dikhta toh sirf seeta ka chehra aur woh dupatta jo usne kharida nahi . Sir ka bhi dimaag chaundhiyaa gaya - " Arre ! kya anaap - shanaap bak rahe ho . Class ka topic pucha maine , kisi shopping list ka saamaan nahi . "
Sir ki tej aawaaz sunke vishnu ko hosh aaya ki woh kya bol diya tha aur kaise bol raha tha - " Sir ! nahi wo actually......mera sar dard kar raha hai isiliye ........ " Ab jo bol diya so bol diya , par aage kuch na bole isiliye vishnu ne bhi apni zubaan bandh kar lii . Sir ka gussa dekhne laayak tha - " Kya dard beta ? Dard hai toh class ke baahar jaao . Get out of my class ! Right now ! " Vishnu aur kuch na bolke , class se baahar chala gaya .
Vishnu ko laga ki yeh shayad itna hi khumaar chhaaya hai uspe par pyaar ke effects ki toh yeh abhi shuruvaat thi . Sote - jaagte , uthte - baithte usko sirf dikhta hai toh seeta ka wahi confused sa chehra . Wahi muskaan jo seeta ne mall se jaate waqt vishnu ko dekhke ki thi . Aisa ehsaas pehli baar huwa hai vishnu ko . Na toh padhaai pe dhyaan de paa raha hai aur na kisi aur kaam me . Seeta ne uspe jaadu sa kar diya tha .
Class me dhyaan gaya par ab hostel me kya hota hai -
Vishnu ke do hi toh dost the shaher me - ek Kunal aur ek Ravi . Kunal ek simple ladka nahi hai . Ravi bhi seedha ladka nahi hai . Kunal dono ka bodyguard jaise rehta hai kyuki woh dekhne me kisi pehelwaan se kam nahi hai . Ravi kabaddi - vabaddi toh nahi jaanta hai par love - kabaddi me uske dono haath chaaku hai . Gin ke yeh teen log rehte hai hostel ke ek hi room me aur ek - doosre se kuch nahi chupaate , Sacchi dosti jo hai teeno ki . Class me teeno hi the aur kunal aur ravi dono ne vishnu ko dupatta shabd bolte suna bhi . Puchtaach toh karni hi hogi vishnu se . Waise abhi room me ravi apne bed pe baithke magazine padh raha hai . Vishnu darwaaze pe khada hai aur baahar na jaane kya dekh raha hai . Vishnu ki aankhein khuli huwi hai par aankhon me seeta ka chehra chhaaya huwa hai isiliye kuch dekh nahi paa raha hai . Saamne se na jaane kitne saathi hostel boys guzarke jaa rahe hai aur hans bhi rahe hai par Vishnu ko koi dikhe toh sahi . Aankhein khuli huwi hai par kuch dekh nahi sakti . Kabhi bhi darwaaze se koi khoobsurat nazaara nahi dikhta hai aur woh bhi boys hostel ke darwaaze se . Dikhta hai toh sirf saamne waali building me rehne waale hostel boys ke geele , rang-birange tange huwe kacchhe . Ajeeb toh yeh hai ki sabhi kacchhe sahi haal me nahi hote , kuch toh phate huwe bhi hai . Par Vishnu ko toh un saamaan me bhi kuch aur hi nazar aa raha hai . Woh sirf baahar taakta jaa raha hai . Ravi itne der se lete huwe magazine padh raha hai par uski ek aankh Vishnu pe bhi hai . Tab se Ravi yeh baat notice kiye jaa raha hai ki Vishnu baahar ghoore jaa raha hai aur woh bhi bina palak jhapkaaye . Jaise koi haseen khwaab dekh raha hai khuli aankhon se . Ravi bhi ek ladka hai . Usko itni jaankaari toh hai ki kab ladka adhmari haalat me khadha rehkar anjaani cheejon ko taadta rehta , kab ladka sunta kuch nahi aur sawaal karo toh toh paglo jaise bakwas karne lagta hai , kab khuli huwi aankhon se bhi kuch dekh nahi paata hai . Ravi in saari baaron ka ek solution nikaalne ke liye Vishnu se hi baat karne ka sochta hai . Par uske liye Ravi ko Vishnu ko hosh me laana hoga . Woh uthta hai apne bed se . Bed ke ek sire pe kisi ki zuraabe rakhi huwi hai , matlab socks . Un socks se itni badboo aa rahi hai ki mara huwa chuha bhi behosh ho jaaye . Magar ek khooye huwe aashiq ko hosh me laane ke liye yeh socks perfect hai . Woh unhe dur se haath me lekar Vishnu ke piche jaata hai taaki uske naak tak inki sadi huwi badboo pahucha sake . Usne socks ko dheere se Vishnu ke naak ke paas laaya aur socks ki sugandhit badboo se Vishnu chauk sa gaya . Socks ki mehek lete hi Vishnu ki naak bandh ho gayi aur woh bedhadhak hosh me aa gaya - " Yeh kya kar rahe ho ? Hataao inhe ! " Hosh me aane pe Vishnu room ke andar aata hai aur bed pe jaaker baith jaata hai - " Kya huwa ? Tum jaante hi na ki yeh socks Kunal ke hai , phir humaari naak pe itna zulm kyu ? "
Ravi kuch bolta ki Kunal bhi room me aa jaata hai . Kunal , ravi aur vishnu room - mates hai . Sirf room-mates nahi balki teeno best friends bhi hai . Vishnu ke mann me kya chalta hai aur kab chalta hai yeh baat ki fikar dono ko rehti hai .
Ravi seedhe - seedhe Vishnu se bol deta hai - " Toh janaab ! kaun hai woh ladki ? Uska hai naam kya ? "
Vishnu ko nahi pata tha ki uske mann me jo chal raha hai woh Ravi itne jaldi samajh jaayega . Woh ravi ki baat sunte ekdum se hairaan ho jaata hai aur aise dikhaane ki koshish karta hai jaise ki kuch nahi huwa hai . Woh turant bed se uthkar baahar ki taraf badhta hai yeh kehte huwe - " Kya bol rahe ho ? Kaun ladki ? Kiska naam ? " Bolte - bolte Vishnu jab darwaaze se baahr nikalne hi waala tha tabhi Kunal ne uska raasta rok diya aur uske kandhe pe haath rakhte huwe Vishnu ko waapis andar laata hai . Vishnu apni anjaan baaton ko aage badhaata hai - " Tumhe shayad koi mis-understanding huwi hai . Aisa kuch bhi nahi hai ! "
Kunal ne Vishnu ko phir se apne aur Ravi ke beech me baithaaya taaki is baar Vishnu bhaag na jaaye . Ravi apna sawaal phir karta hai - " Ab chhupaane ki bhi zaroorat nahi hai . Bataado kaun hai woh ladki ? "
Vishnu abhi kuch bolna nahi chahta kyuki abhi tak toh usne us ladki ko sirf ek hi baar dekha hai aur naam tak nahi jaanta - " Hum kuch chhupaa nahi rahe hai tum logon se yaar . Yeh kya ladki - ladki laga rakha hai ? " Haste huwe bol raha hai par chehre se jhooth saaf pakda jaa sakta hai Vishnu ka .
Abhi tak sirf Ravi hi puch raha tha par ab Kunal ne bhi baat chhedh di - " Ravi ! yaar Vishnu ko pareshaan mat karo . Ab woh nahi bataana chahta toh isko force mat karo . Jab isko lagega ki hume bataana chayiye toh khud bataa dega . " Kunal ne bilkul sahi raasta pakda Vishnu se baat ugalwaane ke liye . Dost - dost waali baat se hi Vishnu kuch bolne waala tha aur Kunal ke bolte hi Vishnu shuru ho jaata hai --
" Waise maine kaheen padha tha ki jab tumhe pyaar hota hai toh tum kabhi aisa nahi sochte ki tum usko khoo sakte ho , tum kabhi aisa nahi sochte ki woh tumhara dill tod sakta hai , tum kabhi aisa nahi soch sakte ki tum kabhi usko apne se dur jaane de sakte ho , tum kabhi aisi baatein soch hi nahi sakte ho . Humaare case me abhi yeh sab nahi huwa hai isliye hum kuch keh nahi sakte abhi . "
Jab dono Vishnu ko aisi baatein karte sunte hai toh dono yeh sochne lagte hai ki - " Abey ! isne aisi kitaab kab padhi ? " Lekin aisa Vishnu ke saamne nahi kaha . Ab aage kya bolna hai , yeh dono ki samajh nahi aaya toh Ravi ne hi baat aage badhaayi - " Tum jaise baat kar rahe ho , waise toh koi bhi behra keh sakta hai ki tumhe pyaar ho gaya hai . " Yehi baat ko thodaa aur badhaaya Kunal ne - " Haan ! aur jaise chehre pe expressions de rahe ho , waise toh koi bhi andhaa keh sakta hai ki tumhe pyaar ho gaya hai . "
Vishnu bed se uthkar phir room ke darwaaze pe khadha ho jaata hai aur waha se baahar ki taraf dekhne ko kehta hai - " Woh baahar aasmaan dekh sakte ho tum log ? " Kunal aur ravi ko laga ki aasmaan me koi nayi cheej aayi hai toh dono turant uthke darwaaze pe pahuchte hai aur upar dekhne lagte hai . Vishnu yeh jaanta hai ki Ravi aur Kunal dono ko uski baat samajh nahi aayi toh woh dono ko upar ki taraf dekhne ko kehta hai , aasmaan me - " Yeh aasmaan hai na , aasmaan , hum aasmaan dekh paa rahe hai par kya hum kabhi aasmaan chhuu sakte hai kya ? " Bahut hi gehra sawaal kiya vishnu ne dono se . Ravi toh thoda - thoda samajh gaya par Kunal abhi - bhi atka huwa hai - " Agar flight pakde toh chhuu sakte hai , kyu ? " Kunal ko yeh koi majaak lag raha hai par Vishnu bilkul bhi majaak nahi kar raha hai is waqt kyuki baat uske dill ki hai --
" Humaara matlab woh nahi tha . Hmm....Dekho yaar ! humne abhi tak usko sirf ek hi baar dekha hai . "
Kunal - " Kisko , Aasmaan ko ? " Baat samajh na paaye aur uske upar aise sawaal kare toh yeh baat saaf ho jaati hai ki Kunal ka pehla maala khaali hai .
Khair ! Vishnu apni baat phir shuru karta hai - " Usse pehli nazar me pyaar me ho gaya , aisa kehna galat hoga kyuki abhi hume pakka nahi hai ki yeh pyaar hai yaa bas ek infatuation . Abhi hum chahte hai ki kuch din aur dekhein ki hum sach me pyaar me hai yaa nahi . Par tab tak please tum dono bhi hume samjho . Kuch din ke liye is topic pe koi baat na karo , please ! "
Ravi maanta hai jo vishnu keh raha hai aur haath aage badhaake haan bhi karta hai . Kunal ke mann me ek aur sawaal hai jo woh puchna chahta hai .
Ravi - " Ab kya huwa ? "
Kunal darwaaze se baahar haath dikhaata hai aur saamne waali building ki taraf dekhkar kehta hai - " Yaar ! woh underwear kiski hai jispar likha hai ' Mr India ' ? "
No comments:
Post a Comment