Untitled Story - The Beginning part 3

Sadak  par  mere alawa koi nahi dikh raha . Sirf kinaare adhmare pade kutte hai  jo abhi neend me hai. Yeh kutte ghar ki rakhwali kya karenge , yeh to insaan se bhi jyada aalsi hai. Mujhe inn jeevo se bada darr lagta hai. Kisi din inn kutto ko goli se uda dunga. Ab nahi par kyuki ab to mere hi udne ki baari aa gayi thi. Chalo kutto ! tum log bach gaye par agle janam me zaroor tumhe maarunga agar insaan bana to. Dheere - dheere suraj apni aankhen khol raha hai. Sadak ke kinaare - kinaare uski muskaan phail rahi hai. Uunche gharo ki wajah se wo beech me nahi aa pa rahi. Hawa me thand hai . Par mujhe ab kya thand aur kya garmi . Kuch hi der me main apne nark-sthaan pe pahuch jaaunga. Waha pe yamraj naav chala raha hoga aur usi naav me baithake wo mujhe swarg le jaayega. Swarg hi le jaayega kyuki mere khayal se maine jyada paap to nahi kiye hai ab tak. Haan , yeh suicide se mere paap ka percentage badh zaroor jaayega. Kadmo ko sambhalte hue main manzil tak pahuch chuka hun. Bandhe ki uchchayi dekhi  , nadi me samadhi leni hai to neeche to utarna hi padega. Aas-paas kuch log dikhne lage . Mujhe darr tha ki kaheen yeh log mujhe bachane ke liye na aa jaaye. Phir se nazron ke saamne do kutte aa gaye. Dono ek-dusre ke saath chorr-police khel rahe the. Iss baar aankhen nahi band karunga kyuki pichle baar band kiya tha to asafal ho gaya tha. Ab suraj poori tarah se apna muuh khol chuka tha. Uski pehli kiran mere niraash aur pareshaan chehre pe padi . Shayad yeh chahti hai ki main ghar wapis chala jaaun. Yeh act mere se na ho isiliye mujhe rokne aayi hai. Par inke liye ek Bad news hai ki main apna faisla le chuka hun. Ab to bhagwan bhi mujhe rok nahi sakta. Bhagwan kya rokenge mujhe , shayad wo bhi chahte hai ki dharti se ek nikamma kam ho jaaye. Unhone mujhe kitne armaano se niche bheja hoga aur main un sab par pani pher ke wapis aa raha hun. Sorry God  ! but next chance me pakka kuch karunga. Maine apne dosto se suna tha ki nadi ke beech me ek mandir hai jo ki ek chamatkari mandir hai. Kaise ? Main batata hun . Jab bhi shahar me baadh aati hai to yeh mandir doobta nahi. Pani ke level ke badhne ke sath yeh mandir bhi upar aa jata hai. Iska matlab yeh mandir paani ke upar tairta hai. Par doobta nahi hai. Kabhi dekha nahi iss mandir ko par aaj dekhna chaha. Socha ki kisi cheej ko kyu chodh dun jab zindagi ka aakhiri samay aa gaya hai.   Nazar ko charo-ore ghumaya aur dur tak pahuchaya par mandir kaheen nahi dikha. Shayad yeh kahaaniyon wala mandir hai jo dikhta nahi sirf sunaayi deta hai. Bhagwan bhi to dikhte nahi sirf sunaayi dete hai. Zameen hari-hari ghaas se bhari hui thi. Inme kitna jeevan hai. Yeh hawa ke saath apna nritya dikhati hai. Inhe jeena kitna pasand hai . Pasand to hoga hi. Akhir inhe kaun si padhai karni hai. Inhe kaun sa kaam karna hai. Inke na to maa-baap hai aur na hi shaher bhar ke rishtedaar hai. Inhe na to bada hoker kuch banne ki fikr hai aur na hi fail hone ka darr. Aap sab mujhe ek haara hua baccha samajh rahe honge. Khair ! ab kisi ki bhi soch se mujhe koi farkh nahi padta. Sirf padhai hoti toh zindagi ko ek aur mauka dene ki soch bhi leta par yahaan toh pyaar ne bhi saath chodh diya hai. Kudrat me do hi toh cheejen hai , ek padhai aur dusri ladki. Jab dono saath na de to tum zindagi chodhne ke alawa aur kya kar sakte ho. Suraj ki roshni aur tej ho gayi. Ab isse pehle aas-paas chahal - pahal honi shuru ho jaaye , usse pahle mujhe samadhi le leni chayiye. Kisi ne dekh liya toh mujhe bachane zaroor aayega. Aur ab main bachna nahi chahta . Train nahi to nadi sahi. Kitna soch raha hun main . Itna pehle socha hota to aaj yeh naubat nahi aati. Marna hai to mar , itna sochna kya. Aankhen samne ka nazara dikhane lagi. Aur samne kya dikhta hai , wahi mandir. Ek chota sa mandir jo nadi ke bich me hai aur nadi ke upar hai. Vishwas nahi ho raha tha par yeh sach me hai . Mandir pani ke upar tair raha hai . Bhagwan ki jholi se nikla ek karishma. Yeh dhekh ke mann aur soch me pad gaya. Dheere- dheere main apna santulan khota jaa raha hun. Kya marna zaroori hai ? Lekin agar marega nahi to kya karega ? Jab sacchai samne aayegi to sabse aankhen kaise mila paayega ? Apne pyaar ko kaise bhoola paayega ? Kaise sabko yeh keh paayega ki tujhse galti ho gayi ? Ab kuch mat soch aur maar dubki. Par agar tair nahi paaya toh. Ohh ! main yeh kya soch raha hun. Tairna nahi aata tabhi to aaya hun yaha.Mere charo taraf logon ki sankhya badh gayi. Kuch to meri hi taraf dekhne lage. Shayad maine yeh dusra mauka bhi gawa diya. Ab yaha khade rehna sahi nahi hoga. Jaldi se ghar nikal le warna logon ko shak ho sakta hai. Main gusse se waha se bhaagne laga. Ab dimaag me kuch nahi chal raha tha. Kuch hi der me main ghar pahucha , chhat ka darwaza khola aur teesri manzil pe khada ho gaya. Ghar hi sabse acchi jagah hoti hai kisi kaam ko anjaam dene ke liye. Mujhe koi nahi dekh raha tha .Na pehle kisi ne dekha aur na aage dekh paayega. Railing pe khada hoker , ek baar aasmaan ko dekh kar  , sab kuch bhool kar , main kud gaya. Teesri manzil se laga di challaang. Ab to bachne ki koi gunzaaish hi nahi. Duniya ko alvida bole bina hi maine duniya ko chodh diya . Shayad mere agle safar me main iss duniya ke kaam aa sakun.